煌府 - 我的婚宴場地

2012年2月25日

相信好多新人都會聽過2012年係雙春兼閏月，所以D酒席可以話爭崩頭。而我同阿威亦於8月計劃結婚時，著手睇左好多間唔同的酒席，一直未能下定決心就因為2月25日早已Full了！聽過有人早39個月book左依日，所以一直都想定其他日子。

但係最後，老一輩話正月唔嫁得女，又要改一改。另一間酒樓野食唔掂，又要改一改。最後，我地可以改的日子，只有7月7日或者7月14日。不過夏天，我地唔想兄弟流晒汗、姊妹溶晒妝，所以我依幾日都好苦惱。

不過，阿威竟然又「坐定粒六」咁一D都唔擔心，仲話都係揀2月25號結婚擺酒。我花左勁耐唇舌去解釋2月25日真係乜都比人book晒，所以要放棄。阿威竟然話，我地由決定結婚開始，預到0既全部都係幸運事，所以佢一D都唔擔心。

不過，事實證明佢係完全正確。

星期六夜晚，我地逐間酒樓打電話去問。阿威問我想要book邊間，我話想要煌府。（不過我一再補充，每間煌府的2月25日已經full晒。）但阿威竟然仲話，唔會0既，一定有方法0既。

最後，阿威係星期六竟然同煌府職員係電話傾傾下時，人地可能見佢太堅持（/太煩），所以比左個Director電話佢，話可以check晒所有分店。當時，我仲話我都每間check過啦!!!無ga la!!!點知最後，阿威打去，對方同佢講將會有新分店開係荃灣，而2012年2月25日仲有期！！

嘩!!!!!!!!!!!!!勁驚喜!!!!!!!!!!!!!!!!!

最後，星期日我地即刻出去The One搵佢睇Floor Plan，煌府真係好好！比左好多優惠我地！最好係佢地大老闆竟然會落黎同我地傾！幫我地畫場分區，真係滿足晒我地的要求！最後，大家即刻愉快成交！

估唔到，我地仲可以book到2012年2月25日依個大吉日!!!!!

好幸運!!!!!!!!!!!yeah!!!!

美心餅卡

早係十二月美心搞緊員工折扣優惠時，便拜托在美心任職的朋友代買二百多張餅卡。放左係家個多月，一直都的唔起心干去DIY，因為個迫切性唔大。不過係今日放假，全日係屋企時，我就的起心干整luuu!!

相信好多JM都會買一個囍字Punch 整美心餅卡。真係好靚！本來又想跟人整埋一份的。仲同阿威講定要佢幫我手壓個Punch，比埋D JM用手用腳0既辛苦相佢睇^^

但係最後，我就DIY左另一款的餅卡套，因為我真係極鐘意蝴蝶啊！連Pre-wedding時，我都要求化妝師幫我用蝴蝶頭飾^^係我最鐘意的造型！不過，隻蝴蝶影完就無左luu~~

所以我就買左個蝴蝶Punch，佢同平時見0既Punch有D唔同，壓完會有立體效果的。同埋買左有槓杆的Punch，所以唔需要太多力，我一個人一個鐘都好快壓左50張餅卡。再每張餅卡都加一粒水晶係側邊。因為我唔想個餅卡套個底都穿埋，所以我就張D封套整開，壓完再粘番起佢^^

最後，每張餅卡都有我最愛的蝴蝶luuu!!!阿威同未來奶奶睇完都話靚呀！

（因為仲未派比人住，所以遲D先upload d相上黎啦!!!）

訂了婚戒啦^^

對於婚戒，我同阿威一向都好有共識的。

男女裝個款要一致的

要有少少玫瑰金的（但又唔要全隻都係！）

男裝外圈唔要有石

女裝要排石。（因為阿威買比我的求婚介指是中間一粒石的款式，所以唔想結婚介指都一樣！ ）

由上年9月開始，我地就展開左我地尋找婚戒之旅。

每次行過金舖都會試戒指，我地起碼睇左足足二百幾款介指。其實我地兩個都鍾情於同一個款色，款色不是太特別的，但係正中我地心目所愛！

但係看過三間有相似款式的金舖，試上手後，總係不覺得完美，因為一些不是個脾位太幼、就是兩圈重位置太多空位。

對於一對帶一世的戒指，我地就真係好執著。

最後，係婚展度，真係比我地找到我地心目中最愛^^

一試上手就即刻OK，即刻落訂，不過因為我地那對是要度身訂造的，不是改圈口，所以可以跟我地意願改一改!!成為我地心目中的Dream Ring^^

KO了一個Item luuu!!

好幸福！因為我同阿威都覺得自從我地定左婚期開始，發生在我地身邊的事都是幸運、完美的。好多優惠圍繞著我地啊!!!即使是身邊的小事，都係旺到腳指尾!!!!

王子攝影 。排版篇

我好懶！每次有大事先黎update。

終於到了睇排版的日子了！

本來排版係要4點先可以睇0既，但因為當日我同阿威都放假，所以佢地好好咁提早比我地睇。初時，我仲以為係好似上次揀相咁，比我地自己慢慢揀，之後Mark低想點改，再搵時間上黎睇。

點知原來係排版師會先比我地全部睇一次，之後即場按我地要求當面幫我地改的。抵讚！我同阿威成程係到發出大鄉里的聲音，因為佢實在真係好快…

我地對佢0既排版好滿意，兩本18寸大相簿20頁排版設計入面，我地只係改了其中一頁的一個框，因為我強烈要求唔要心心框^^其他，完全無改動。

但有一相張好搞笑，就係因為入面有燈光師隻手穿左崩。我上次揀相就mark低左「請修手」。點知，佢幫我修幼左隻手。哈哈！一睇，阿威即刻話：嘩！你隻手搞乜呀？但排版師都勁速幫我搞掂番晒，不過依張相，我地係唔入相簿0既…

中途都睇左其他客0既相，發覺原來我地個次真係好幸運，有咁多張夜景相比到我地。好感恩！因為我地夠相一本入日景、一本夜景，真係好幸運！

之後，等佢地將D相底同排版設計燒入晒碟，我地就走luuuuu…不過，又一如近兩次上去，又同Lisa、Sandy係到拉鋸左好耐！因為我同阿威都覺得一簽左名，就真係唔可以控制得咁多…雖然，佢地開出0既Offer一次比一次吸引。但係，依D都係阿威話事。堅決Say NO!!

食埋飯就回家luuu！我好鐘意依輯相呀！

其他D相放落下個私有化0既Post度…

P.S 連最後一項成品任務都完成，油畫依家又20寸upgrade到24寸luuu!Yeah!!!

之前，仲好比心機整左個成品Trade List，分享左王子每樣成品可以轉0既野，同我trade到番黎0既方法，希望大家都可以唔駛多費一分一毫就換到自己心目中0既成品啦^^




相關閱讀：
一：王子攝影。優惠篇
二：王子攝影。Trade List
三：王子攝影。揀衫注意事項
四：王子攝影。婚照Check List
五：王子攝影。揀衫篇
六：王子攝影。拍攝篇
七：王子攝影。揀相篇
八：王子攝影。成品大合照

王子攝影。揀相篇

哎呀！頭先見到自己上次揀衫篇0既網誌有錯字，想改番0岩個陣。點知按錯制Delete左=.=唉…重新打過！

12月27日終於上左去揀相啦！等到我頸都長埋。本來影完十日之後就可以揀相ga la,但因為要同阿威夾假，所以等左咁耐先上去。

7點幾起身，9點幾到左門市，買埋兩個麥當勞餐就上到去啦！一去到，有一對當日影相0既新人係到等影室內景。琪琪已經即刻比左支強心針我地!!好期待。

我地先睇第一次佢執好0既相先，一路睇一路係咁大笑。一來係真係好鐘意輯相，二來就係有個POSE係阿威抱住我影0既，但我地完全都無為意過要小心條裙會貢起，所以最終，個個POSE 0既幾張相都好搞笑，wakaka~!!!

之後Lisa就拎左張成品List比我地，我同阿威就按原先商量左0既安排同佢trade成品（其實，每次依d都係我負責出動去傾！），最終Trade到以下0既野，好滿意！

36寸板畫

20寸油畫

12寸水晶臺架
10寸水晶臺架
10寸OS臺架
7寸OS臺架

2本18寸PVC+ Design相簿 （分左一本日景、一本夜景）

2本10寸相簿 （一本用左黎入上面大相簿0既漏網之魚、另一本就係我地最鐘意0既開心相，全部都唔係著重影景0既，主面係捕捉我地開心表情0既，阿玲幫我地對相時，一睇完本相簿D相都話真係比人感覺好開心，好幸福！）
四本相簿加埋封面共入左104張相！

36寸簽名布（依個決定唔要，改左個做相架，因為我已決定要整簽名相簿）
360度旋轉水晶
排版碟

我地足足用左五個幾鐘去決定所有成品嘅相，睇相睇到好倦！我同阿威當堂驚下次去台灣，由400張相入面揀46張相點揀好！因為依家我地係有晒全部相soft copy只係揀入相簿都諗爆頭。到時點算好呢！！

最後，就約埋排版師見面時間。因為佢先做一次排版，之後當住排版師會面跟你要求去改。

當日，王子門市真係太多人啦，有人試衫、兩對人揀相、有人睇排板、又有人定Join Plan！不過，對我地黎講係好0既，因為佢地太忙，唔記得左朝早Chur我地件事，只係臨走前係Lift口Lisa醒起，同我地拉鋸左一陣，之後阿威堅決下，我地先快速走入Lift^^哈哈！

P.S返到黎，睇下人地0既Blog就覺得自己好蠢，因為我無Chur佢地比幾張相我拎走，又唔識用相機偷影D相。唯有等1月18號上去睇排板個陣，先可以拎晒D底片。
依家好想快D睇相呀!!!!!



相關閱讀：
一：王子攝影。優惠篇
二：王子攝影。Trade List
三：王子攝影。揀衫注意事項
四：王子攝影。婚照Check List
五：王子攝影。揀衫篇
六：王子攝影。拍攝篇
七：王子攝影 。排版篇
八：王子攝影。成品大合照

王子攝影。拍攝篇

太懶啦！影完相過左20日，我終於的起心干打當日事宜。

12月3日影相日，因為我地影石門，由深圳開車去都要三個鐘幾，所以我地一早6點半就起身，7點半就到王子門市。

當日化妝師係琪琪、助手小雪

攝影師阿陽、仲有一個攝影助手

化妝時，琪琪會好尊重你意見，問定你想要乜野造型（雖然佢本身已經包好多頭飾同首飾提供，但因為阿威買左兩條珍珠鍊同頭飾比我，所以我同佢講，我想點。之後佢就同我分析定邊D飾物襯邊套衫等等……）。

因為我要求唔好化得好濃，又抗拒好多層0既假眼睫毛，所以最後佢都好輕手，化得我好自然！而有一個小小插曲就令我同阿威全程影相都好開心，因為琪琪同小雪一見到阿威就話阿威好似一個歌星，搞到我全程都係到唱歌，wakaka!!!

拍攝個陣，全程我地好似郊遊咁，好開心。上車前，琪琪已經同我地去買定早餐，一上車就傾計同訓覺，我就算化好妝換好衫都訓得好臨。不過阿威就好慘啦！因為我地兩個都病，佢胃痛，全程都訓唔著。

去到石門已經十二點幾啦！真係好多人，我估都有三十幾對人係同一個景點。每到一個景點影相，化妝師琪琪會先幫我補妝，執靚D。助手小雪就幫我地影下花恕，而攝影師阿陽同助手就會去搵靈感，同不斷試下D角度光線等等…

 我地先影紅葉區，好靚！有個景點係要爬落D石度，阿陽說好危險，但我見到人地影，我當時剛換左鞋，著住三寸高跟鞋都照去，全程四個人加埋阿威都擔心我，驚我跌落水。最後，有驚無險！

因為真係好多人，其實全程都係大家爭位影咁。不過阿陽好搞笑，不斷叫我地行過D，行過D咁就霸到D靚位，又唔會浪費時間。最重要係佢好為我地著想，有時有D景點見到人排緊隊，唔好意思影得耐，我話一陣返黎再影。佢都話唔好！唔好讓人！！化妝師琪琪一路見住我地，係咁笑！話阿陽好奸！但問心，我覺得佢係為客著想。眼見有D攝影師係到不斷吸煙、等D新人排完隊先再去影相，好差呀！全程阿陽都好落力，又帶梯去爬高，又訓地咁，好認真。佢又會不斷講：『笑多D！笑靚D！』又引我地笑黎捕捉我地自然表情。因為阿威成日眨眼，我當日聽得最多係：「靚仔，唔好眨眼！」不過，最好笑係每個景點都要我地錫錫，阿威係咁話：「又錫！好多人wor!!」哈哈…

影左竹林、溪河、小橋流水等等…每影完一個景點都要再上車坐幾個字先到另一個景點。我同阿威講好似仲係中大返學咁，又係成個山，上完一堂轉堂都要搭校巴，搭幾個字去另一堂。哈哈…

不過一到五點幾，已經日落啦！入夜之後就真係好凍！阿威落左套西裝都話好凍，而我就淨係著左婚紗更加凍！不斷係到震！之後海豚幫我地整左0既小道具就出場啦！因為個度叫七彩天池！好多好靚0既花，同埋有風車，有個狹谷咁。最好笑係化妝師幫我飄頭紗，但我0既眼神就次次都望住個頭紗飄，攝影師阿陽不斷叫我唔好再望個頭紗，哈哈！之後化妝師幫我地吹波波整下效果，但D波就不斷係我地塊面度爆，好凍！！

影到六點幾，終於影完luuuuu!!!!之後我地一行八人就去左食農家菜，仲有走地雞！好好味！返去時候，何司機行錯路，我地仲比公安查身份證，但我地全部都冇帶證件，好彩佢見到我set晒頭，又有晒飛就放我地走。我地返到王子門市都已經11點半luuu

之後何司機再車埋我地去皇崗過關返香港！

咁就完成左第一次0既婚紗攝影之旅！好開心！整體來講，我比王子當日0既表現五粒星。影完十日就可以揀相ga la,但我同阿威要夾假，加上27日又返去同朋友食buffet，所以我地就改左27日先揀相^^好期待D相呀！！

依張就係化妝助手幫我地偷影0既相啦!

我個package包180張相，但佢起碼影超過230張，不過佢都係全部比番晒我地0既。



相關閱讀：
一：王子攝影。優惠篇
二：王子攝影。Trade List
三：王子攝影。揀衫注意事項
四：王子攝影。婚照Check List
五：王子攝影。揀衫篇
六：王子攝影。揀相篇
七：王子攝影 。排版篇
八：王子攝影。成品大合照

王子攝影。揀衫篇

11月28號，我同阿威就上左去試衫，但當日試左幾套Sales推介0既婚紗同晚裝，都係唔太合心水，所以心大心細揀唔到。

Sales又同我講星期一會返D新衫，所以係影相前一日，12月2號，我地又上去試多次。

今次我就上去前係王子website睇中左D自己鐘意婚紗款，就save 低D相比佢睇，問下佢有冇0既。

本來我打定輸數，因為我睇晒佢post D客0既相，一個都冇著過我鐘意0既款色，所以我都預左冇個件，只係想搵類似0既。但係真係勁幸運呀！佢現成有個件婚紗，仲要冇乜人著過！！原來之前好多人著上身，覺得件衫效果唔好，所以佢就爽性冇推介過比我，但我就係勁古怪，鐘意依D款，所以一試就即決定左。期間，佢強烈建議我著兩件晚裝同埋唔好晚裝同婚紗都同樣係紗款，但我最後都係勁固執咁揀左自己鐘意0既款色，D相就係Post係下個私有化0既網誌。

但係阿威就竟然全部D褲都冇一條0岩佢，全部唔係褲腳短就腰位太闊。仲要我地心儀D西裝褸款全部都係好大件。最慘係我地第二日就要影相，返唔到屋企拎褲。而我地第一次試衫係星期日，所以佢唔比男仔試，淨係試女仔先，所以搞到我地失左預算，唔係就自己帶條西褲過去。所以，大家就小心男仔D size呀！因為婚紗同晚裝都可以加扣針，但男仔西裝褸同褲唔0岩size就好煩ga la!

影相個part就待續啦.......


相關閱讀：
一：王子攝影。優惠篇
二：王子攝影。Trade List
三：王子攝影。揀衫注意事項
四：王子攝影。婚照Check List
五：王子攝影。拍攝篇
六：王子攝影。揀相篇
七：王子攝影 。排版篇
八：王子攝影。成品大合照